იაფი ავიაბილეთები სალონიკში

თეთრი სასახლე, ან თეთრი კოშკი (White Tower) სალონიკის სიმბოლოა, რომელიც დროში მოგზაურობის შეგრძნებას გაგიჩენთ. მართალია, იგი შუა საუკუნეების შემდეგ ხელახლა აშენდა, თუმცა დღემდე შენარჩუნებული აქვს სიძველისა და ისტორიულობის ეფექტი. ეს ნაგებობა ოდესღაც ოსმალეთის იმპერიის ნაწილს წარმოადგენდა, დღეს კი საბერძნეთის ერთ-ერთ მთავარ სიმბოლოდ ითვლება.

სალონიკი ნამდვილად გაგაოცებთ თავისი მრავალფეროვანი ეკლესიებითა და ბაზილიკებით. განსაკუთრებით აღსანიშნავია წმინდა დიმიტრის ტაძარი, რომელსაც დიდი რელიგიური, სიმბოლური და ისტორიული მნიშვნელობა აქვს. მნახველები აღფრთოვანებულნი არიან როგორც მისი ინტერიერით, ისე ექსტერიერით, რაც ტაძრის განსაკუთრებულ არქიტექტურულ სტილზე მეტყველებს. ქალაქში სეირნობისას ხშირად შეხვდებით როგორც პატარა სალოცავებს, ისე გრანდიოზულ ტაძრებს, რაც ნათლად ასახავს ბერძნების მდიდარ კულტურულ მემკვიდრეობასა და რელიგიურობას.

იცოდით, რომ საბერძნეთი ძველი ფილოსოფიის აკვანია? სწორედ ამიტომ, სალონიკის ერთ-ერთ ცენტრალურ მოედანს ძველი ბერძენი ფილოსოფოსის, არისტოტელეს, სახელი ჰქვია. აქვე ნახავთ მის სიდიადით გამაოგნებელ ქანდაკებასაც: მარცხენა ხელში არისტოტელეს ფურცელი უჭირავს, მარჯვენა კი მუხლზე აქვს დასვენებული.

სალონიკის წმინდა სოფიას ტაძარი საბერძნეთის ერთ-ერთი უძველესი და გამორჩეული ნაგებობაა. ის VII საუკუნეში სტამბოლის წმინდა სოფიას ტაძრის მიხედვით აშენდა, ამიტომაც გამოირჩევა ბიზანტიური არქიტექტურის გრანდიოზულობითა და სიდიადით.

თუ ზღვის პროდუქტები გიყვართ, სალონიკი ნამდვილად გაგაოცებთ თავისი მრავალფეროვნებით. აქ ზღვის ნობათის შეძენა შეგიძლიათ როგორც ხშირად გამართულ ბაზრობებზე, ისე სპეციალიზებულ მაღაზიებსა თუ ადგილობრივ ტავერნებში. ასევე, ნებისმიერ რესტორანში დაგხვდებათ ზღვის პროდუქტების ფართო არჩევანი.

სუვლაკი არის ტრადიციული ბერძნული კერძი, რომელიც ადგილობრივთა ფავორიტია და თითქმის ყველგან შეგიძლიათ დააგემოვნოთ – კაფე-ბარებში, რესტორნებსა თუ ქუჩის დახლებზე. ის, როგორც წესი, პიტაში გახვეული ხორცისა და ბოსტნეულის კომბინაციას წარმოადგენს, თუმცა ვეგეტარიანელებისთვის უხორცო ვარიანტიც ხელმისაწვდომია. მისი განუმეორებელი გემო ნამდვილად დაუვიწყარ შთაბეჭდილებას დატოვებს.

სპანაკოპიტა არის გემრიელი ნამცხვარი, რომელიც ცომში გამომცხვარი კრემყველის მასით მზადდება. ის იდეალურია, თუ სეირნობის დროს გემრიელი წახემსება გიყვართ. სპანაკოპიტას გამორჩეული გემო აქვს, რაც ძირითადად ბერძნული ყველის დამსახურებაა.

თუ მსუბუქი კერძი გსურთ, ბერძნული სალათი შესანიშნავი არჩევანია. მასში შედის ბოსტნეული, ზეთისხილი და ყველი ფეტა. ის არა მხოლოდ გემრიელი, არამედ ჯანსაღიცაა.