პრაღა – დაგეგმე სრულყოფილი მოგზაურობა

ტურისტებისთვის ერთ-ერთი ყველაზე პოპულარული დასარჩენი ადგილია ძველი ქალაქი (Staré Město), რომელიც ცნობილია თავისი ისტორიული ღირსშესანიშნაობებითა და უნიკალური არქიტექტურული სტილით. აქ მრავლადაა კულტურული ძეგლები, რაც მას განსაკუთრებით მიმზიდველს ხდის.

ვინოჰრადი (Vinohrady) – ეს უბანი თავისი სახელითე მიგვანიშნებს მის წარსულზე – აქ ადრე ვენახები იყო გაშენებული და დღემდე შენარჩუნებული აქვს მშვიდი, ბუნებრივი ატმოსფერო. ვინოჰრადში ასევე ნახავთ პრაღის ერთ-ერთ დიდ ბულვარსაც.

ახალი ქალაქი (Nové Město) – პრაღის ერთ-ერთი უდიდესი უბანია, რომელიც ტერიტორიულად ძველ ქალაქსაც კი აღემატება. იგი ცნობილია თავისი გასართობი ადგილებითა და შედარებით თანამედროვე არქიტექტურით.

მალა სტრანა (Malá Strana) – ეს არის ტურისტებისთვის მოსახერხებელი და მიმზიდველი ადგილი. მიუხედავად იმისა, რომ პრაღის მთავარი მოედანი ძველი ქალაქის მოედანია, მალა სტრანა ასევე ქალაქის მნიშვნელოვანი უბანია, რომელიც ცნობილია თავისი ისტორიული ხიბლით. აქ ადრე ძველი ბურჟუაზიული სახლები მდებარეობდა, რომლებიც დღეს მდიდრულ მაღაზიებადაა გადაკეთებული, რაც უბანს განსაკუთრებულ მომხიბვლელობას სძენს.

ჰრადჩანი (Hradčany) – ეს არის კიდევ ერთი ისტორიული უბანი, სადაც პრაღის ციხესთან სიახლოვით, ტურისტული ღირსშესანიშნაობების ეპიცენტრში აღმოჩნდებით. თუ პრაღაში მარტივად და სწრაფად გადაადგილება გსურთ, ამ უბანში დარჩენას გირჩევდით.

Prague Castle – Pražský hrad არის ჩეხეთის რესპუბლიკის ყველაზე მნიშვნელოვანი ძეგლი და მსოფლიოს უდიდესი უძველესი ციხესიმაგრეების კომპლექსი. პრაღის ციხე მოიცავს არაერთ შენობასა და ღირსშესანიშნაობას, მათ შორისაა: წმინდა ვიტუსის ტაძარი, ძველი სამეფო სასახლე, წმინდა გიორგის ბაზილიკა, ოქროს შესახვევი და სხვ. ციხიდან იშლება ულამაზესი პანორამული ხედები პრაღაზე.

Old Town Square – Staroměstské náměstí არის პრაღის გული და ყველაზე ცოცხალი მოედანი. ისტორიული შენობებით გარშემორტყმული მოედანი იუნესკოს მსოფლიო მემკვიდრეობის ძეგლთა სიაშია შეტანილი. აქ ნახავთ ასტრონომიულ საათს, წმინდა ნიკოლოზის ეკლესიას, ტინის ღვთისმშობლის ეკლესიას, მრავალფეროვან კაფეებს, რესტორნებსა და მაღაზიებს.

კაფკას მუზეუმი პატივს მიაგებს ჩეხეთის ლეგენდარულ მწერალს, ფრანც კაფკას, და მისი ცხოვრების მნიშვნელოვან დეტალებს გვაცნობს. მუზეუმში წარმოდგენილია მწერლის პირადი ნივთები, სხვადასხვა გამოცემის წიგნები, კაფკას ცნობილი ფრაზები და დოკუმენტური მასალები, მათ შორის მცირე ფილმები, რომლებიც კაფკას ცხოვრებისა და შემოქმედების ინტერპრეტაციას გვთავაზობს. ეს ადგილი განსაკუთრებით საინტერესოა კაფკას თაყვანისმცემლებისთვის და ყველასთვის, ვისაც სურს მწერლის სამყაროს უფრო ახლოს გაცნობა.

Charles Bridge – Karlův most არის პრაღის ერთ-ერთი ყველაზე ცნობილი სიმბოლო. მე-14 საუკუნეში აგებული ეს ისტორიული ხიდი მდინარე ვლტავას კვეთს და ერთმანეთთან ძველ ქალაქსა და მცირე უბანს (Malá Strana) აკავშირებს.

ხიდზე განთავსებულია 30 ბაროკოს სტილის ქანდაკება, მათ შორის წმინდა იოანე ნეპომუკის ცნობილი ქანდაკება. აქ ხშირად შეხვდებით ქუჩის მხატვრებს, მუსიკოსებსა და სუვენირების გამყიდველებს. გირჩევთ, ხიდზე ადრე დილით ან გვიან ღამით გაიაროთ, რათა თავი აარიდოთ ხალხმრავლობას და ისიამოვნოთ მშვიდი ატმოსფეროთი.

Jewish Quarter – Josefov ძველი ქალაქის ნაწილია, რომელიც მდიდარია ისტორიითა და სინაგოგებით. ეს არის ერთ-ერთი ყველაზე კარგად შემონახული ებრაული გეტო ევროპაში. აქ მდებარეობს ძველი ებრაული სასაფლაო – ერთ-ერთი ყველაზე უნიკალური და ძველი სასაფლაო მსოფლიოში, სადაც საფლავის ქვები ერთმანეთთან ძალიან მჭიდროდაა დალაგებული და ებრაული მუზეუმი, რომელიც რამდენიმე სინაგოგას მოიცავს (მაგალითად, ძველ-ახალ სინაგოგას და პინკასის სინაგოგას).

პრაღის ერთ-ერთი ყველაზე არაორდინარული და ცნობილი არქიტექტურული ნაგებობაა მოცეკვავე სახლი (Dancing House – Tančící dům), რომელიც მდინარე ვლტავას ნაპირზე მდებარეობს.

შენობა ორი კოშკისგან შედგება, რომლებიც ერთმანეთში იკვეთება და თითქოს მოცეკვავე წყვილს განასახიერებს. სწორედ ამ მსგავსების გამო შეარქვეს მას “ფრედი და ჯინჯერი” (ცნობილი მოცეკვავე წყვილის, ფრედ ასტერისა და ჯინჯერ როჯერსის პატივსაცემად).

პრაღის კულინარია მსოფლიოში საკმაოდ დაფასებულია. მიუხედავად იმისა, რომ ძირითადი კერძები ხორცზე, განსაკუთრებით კი იხვის ხორცზე მზადდება, აქ მრავლად ნახავთ ვეგეტარიანულ ვარიანტებსაც. ქვემოთ რამდენიმე ყველაზე პოპულარულ რესტორანს შემოგთავაზებთ:

W Restaurant
ეს რესტორანი პრაღაში ერთ-ერთი ყველაზე პოპულარულია. გარდა უგემრიელესი კერძებისა (მათ შორის ვეგეტარიანული), აქ უამრავ სასმელს ნახავთ. რესტორანს საკუთარი კოლექციაც აქვს, საიდანაც რამდენიმე ალკოჰოლური სასმლის დაგემოვნებას გირჩევდით.

Restaurant Zvonice
ეს რესტორანი მე-15 საუკუნის გოთურ სამრეკლოში მდებარეობს, რის გამოც განსაკუთრებული, მაგიური ატმოსფერო აქვს. აქ დააგემოვნებთ ჩეხური კულინარიის შედევრებს და იგი პრაღაში ერთ-ერთ ყველაზე პოპულარულ რესტორნად მიიჩნევა.

პრაღაში ყველაზე ცნობილი კერძი ღორის ხორცისგან მომზადებული პელმენებია (vepřo knedlo zelo). თუ ხორცის მოყვარული ხართ, ეს გამოცდილება არ უნდა გამოტოვოთ! ჩვენ გაგიზიარებთ ხრიკს, თუ სად მიირთვათ ყველაზე გემრიელი ეროვნული კერძი პრაღაში:

Lokál – ეს ადგილი ადგილობრივებში დიდად სახელგანთქმულია. აქ სახლურად, უგემრიელესად მომზადებულ პელმენებს მიირთმევთ. თუ ადგილობრივებს გსურთ შეერიოთ ან აქაურ კულტურას უკეთ დააკვირდეთ და თანაც უგემრიელესადაც ივახშმოთ, აუცილებლად ეწვიეთ ამ ადგილს. თანაც, იგი გვიანობამდე მუშაობს.

პრაღაში რამდენიმე გამორჩეული რესტორანია, სადაც გემრიელ კერძებთან ერთად ქალაქის ულამაზესი ხედებითაც დატკბებით:

Restaurant Mlýnec
ეს რესტორანი კარლის ხიდს გადმოჰყურებს, საიდანაც პრაღის საუკეთესო ხედი იშლება. მენიუში კი ადგილობრივი წარმოების კერძებია წარმოდგენილი.

Marina Ristorante
ამ რესტორნიდან პრაღის სასახლის ულამაზესი ხედი გადაგეშლებათ. თუ მნიშვნელოვან ვახშამს გეგმავთ, უთუოდ ამ რესტორანზე უნდა შეაჩეროთ არჩევანი. ის მდინარეს გადაჰყურებს, შესაბამისად, აქ მზის ჩასვლის ნახვა ერთი სიამოვნებაა.

Coda Restaurant
ეს პრაღის ერთ-ერთი ელიტარული რესტორანია, რომელსაც ქალაქის ულამაზესი ხედი აქვს. შესაბამისად, კერძებთან ერთად ქალაქის დათვალიერებითაც დატკბებით.

პრაღა სამართლიანად ითვლება ლუდის სამშობლოდ, ხოლო ჩეხური ლუდი მთელ მსოფლიოშია სახელგანთქმული. გთავაზობთ რამდენიმე ადგილს, სადაც ჩეხური ლუდის საუკეთესო ვარიანტებს დააგემოვნებთ:

U Kunštátů
ეს ბარი ძველი ქალაქის მოედანზე მდებარეობს, ამიტომ მისი მიგნება არ გაგიჭირდებათ. აქ სხვადასხვა სახეობის ჩეხური ლუდის დაგემოვნებას შეძლებთ. თანაც, ეს ბარი ადგილობრივების ფავორიტიცაა, რაც მის ხარისხზე ბევრს მეტყველებს.

Beer Point
ამ პაბში უამრავი სახეობის ლუდის გასინჯვას შეძლებთ. აქ ყველა სტუმარი იპოვის თავისი საყვარელი სახელობის ლუდს. პაბი ქალაქის ცენტრშია განთავსებული და გაძლევთ საშუალებას, ჯერ დეგუსტაციით დაიწყოთ და მხოლოდ შემდეგ აარჩიოთ სასურველი ვარიანტი.

პრაღა ნამდვილი სამოთხეა შოპინგის მოყვარულებისთვის, რადგან აქ მრავალფეროვან სავაჭრო ცენტრს აღმოაჩენთ.

პალადიუმი (PALLADIUM)
პრაღაში ერთ-ერთი ყველაზე ცნობილი სავაჭრო ცენტრია. აქ არა მხოლოდ მრავალი მაღაზია დაგხვდებათ, არამედ შეგიძლიათ დასასვენებლადაც მოიცალოთ ცენტრში მოწყობილ კაფეებში.

პრაღის აუთლეტ ცენტრი (Fashion Arena Prague Outlet)
ეს არის ჩეხეთის რესპუბლიკის ყველაზე მონახულებადი სავაჭრო ცენტრი ბიუჯეტური შოპინგისთვის. აქ უამრავი მაღაზიაა წარმოდგენილი, რაც მთავარია, მინიმუმ 30%-იანი ფასდაკლებით. ცენტრს მეტროდან საკუთარი ტრანსპორტი ემსახურება, რაც მისვლას ამარტივებს.

პრაღაში შოპინგისთვის საუკეთესო ქუჩებად პრიკოპი (Na Příkopě) და 28 რიჯნა (28. října) ითვლება. ეს ქუჩები გვერდიგვერდ მდებარეობს და მთელ სიგრძეზე უამრავ ადგილობრივ მაღაზიას შეხვდებით. ისინი სასეირნოდაც საკმაოდ კომფორტული და მოსახერხებელია.

პრაღა ცნობილია თავისი მრავალფეროვანი ბაზრებით, სადაც იპოვით ადგილობრივ პროდუქციას, სწრაფი კვების ობიექტებსა და სურსათ-სანოვაგეს. ბაზრობები პოპულარულია ტურისტული ღირებულებითაც, რადგან აქ უამრავი ადამიანი იყრის თავს და საინტერესო მოწყობით გამოირჩევა.

ჰოლესოვიცეს ბაზარი (Holešovice Market)

პრაღაში ყველაზე პოპულარული ბაზარია, რომელიც 24 საათის განმავლობაში მუშაობს. აქ უამრავ პროდუქტს, მათ შორის ტკბილეულს, ნახავთ.

ჰაველის ბაზრის მოედანი (Havelské tržiště)

ამ ბაზარში გასეირნება დიდი სიამოვნებაა. აქ შეგიძლიათ შეიძინოთ თქვენ თვალწინ დამზადებული ტკბილეული.

ფლი მარკეტი (Flea market)

პრაღაში ხშირად იმართება ფლი მარკეტები, რაც გულისხმობს, რომ ბევრი ადამიანი და კომპანია თავის პროდუქციას შედარებით დაბალ ფასად გამოაქვს ქალაქში გასაყიდად.

თუ პრაღაში სუვენირების შეძენა გსურთ, რამდენიმე პოპულარულ ადგილს შემოგთავაზებთ:

ძველი ქალაქის სუვენირების მაღაზია (Old Prague Souvenir shop)
ეს მაღაზია ძველი ქალაქის ტერიტორიაზე, საკმაოდ ტურისტულ ადგილას მდებარეობს. აქ უამრავ სუვენირს ნახავთ, იქნება ეს პრაღის გამოსახულებიანი ნივთები თუ აქაური ღირსშესანიშნაობების მინიატურული ვარიანტები.

ადგილობრივი არტისტები (LOCAL ARTISTS)
ეს მაღაზია ასევე ცნობილია ორიგინალური სუვენირებით. აქ ადგილობრივი ხელოვანების ნამუშევრებსაც ნახავთ, რაც თქვენს შენაძენს განსაკუთრებულ ხიბლს შესძენს.

პრაღის მეტრო გადაადგილების ყველაზე სწრაფი და საიმედო საშუალებაა. მას 3 ხაზი აქვს (A – მწვანე, B – ყვითელი, C – წითელი), რომლებიც ქალაქის მთავარ ნაწილებს აკავშირებს.

ეს ტრანსპორტი ატრაქციონების უმეტესობასთან მარტივად მიგიყვანთ. მუშაობს დილის 5:00 საათიდან შუაღამემდე.

პრაღაში ავტობუსებით სარგებლობა შეგიძლიათ როგორც დღისით, ისე ღამით. ისინი დილის 4:30-დან შუაღამემდე მუშაობენ. დღის ავტობუსები ყოველ 10 წუთში დადის, ღამის კი – ყოველ 30 წუთში. აეროპორტიდან პრაღის ცენტრამდე მგზავრობა შეგიძლიათ 110 ან 119 ნომერი ავტობუსებით, რომლებიც ტურისტებში განსაკუთრებით პოპულარულია.

პრაღაში ტაქსები შედარებით ძვირი ალტერნატივაა, თუმცა სხვა ევროპულ ქვეყნებთან შედარებით შესაძლოა უფრო იაფიც კი მოგეჩვენოთ. თითოეულ კილომეტრზე დაახლოებით $1.50-ის გადახდა მოგიწევთ. გირჩევთ, მხოლოდ ოფიციალური ტაქსის სერვისებით ისარგებლოთ. ქვემოთ გთავაზობთ მათ ჩამონათვალს:

• ProfiTaxi: (+420) 844 700 800
• CityTaxi: (+420) 257 257 257
• TaloTaxi: (+420) 244 114 411
• Fix Taxi: (+420) 722 555 525
• Taxi Praha: (+420) 222 111 000

პრაღას ფართო ტრამვაის ქსელი აქვს, რომელიც მეტროს ქსელს ავსებს და ქალაქის მრავალ ნაწილს ფარავს. ტრამვაი შესანიშნავი საშუალებაა ქალაქის დასათვალიერებლად, რადგან ხშირად გადის ულამაზეს ქუჩებსა და ღირსშესანიშნაობებთან.

ასევე არსებობს ღამის ხაზები, რომლებიც შუაღამის შემდეგაც მოქმედებს.

პრაღაში ფეხით სეირნობას აბსოლუტურ რეკომენდაციას ვუწევთ. მაგალითად, ქალაქის ცენტრალურ მოედანზე, ძველი ქალაქის ტერიტორიაზე, ტურისტული ღირსშესანიშნაობები საკმაოდ ახლოს მდებარეობს ერთმანეთთან. პრაღა საკმაოდ უსაფრთხო ქალაქია სეირნობისთვის.

პრაღაში საზოგადოებრივი ტრანსპორტით კომფორტული გადაადგილებისთვის შეგიძლიათ შეიძინოთ 1- ან 3-დღიანი ბარათები:

• ერთდღიანი ბარათი: დაახლოებით $5 ღირს და 24 საათის განმავლობაში გაძლევთ ულიმიტო წვდომას საზოგადოებრივი ტრანსპორტის ყველა საშუალებაზე.
• სამდღიანი ბარათი: მისი ღირებულება დაახლოებით $14-ს შეადგენს და სრული სამი დღის განმავლობაში შეძლებთ საზოგადოებრივი ტრანსპორტით გადაადგილებას.

გაითვალისწინეთ, რომ ბარგით მგზავრობის შემთხვევაში, დამატებითი $1-ის გადახდა მოგიწევთ.

პრაღის ერთ-ერთი ყველაზე დიდი და პოპულარული მწვანე სივრცეა. აქ ნახავთ პეტრინის კოშკს (პრაღის “ეიფელის კოშკი”), საიდანაც ქალაქის ულამაზესი პანორამული ხედები იშლება. ასევე მოინახულეთ ვარდების ბაღი, სარკეების ლაბირინთი და შტეფანიკის ობსერვატორია. ბორცვზე ასვლა შეგიძლიათ ფეხით ან ფუნიკულიორით.

სტრომოვკას სამეფო ნაკრძალი (Stromovka Royal Game Reserve), რომელიც დღეს უბრალოდ სტრომოვკას პარკის სახელითაა ცნობილი, პრაღის უდიდესი და ერთ-ერთი ყველაზე პოპულარული მწვანე სივრცეა.

ეს პარკი მე-13 საუკუნეში, მეფე პრჟემისლ ოტოკარ II-ის დროს დაარსდა, როგორც სამეფო სანადირო ნაკრძალი. დროთა განმავლობაში ის თანდათან გარდაიქმნა და მე-19 საუკუნიდან საზოგადოებისთვის გაიხსნა, რითაც დღევანდელი სახე მიიღო, როგორც ინგლისური სტილის ლანდშაფტური პარკი.

მდებარეობს მცირე უბანში, ვალენშტაინის სასახლის (ჩეხეთის სენატის ადგილსამყოფელი) ტერიტორიაზე. ეს არის დიდებული ბაროკოს სტილის ბაღი, რომელიც გამოირჩევა თავისი მოვლილი გაზონებით, შადრევნებით, ბრინჯაოს ქანდაკებებით (რომლებიც მითოლოგიურ თემებს ასახავს) და უზარმაზარი “მანიერიზმის გროტო-კედლით” (grotto wall). ზაფხულობით აქ ხშირად იმართება კლასიკური მუსიკის კონცერტები.

მდებარეობს მდინარე ვლტავას მარცხენა სანაპიროზე, პრაღის ციხის მოპირდაპირედ. ეს პარკი განთქმულია თავისი ფართო გაზონებითა და განსაკუთრებული პანორამული ხედებით ძველ ქალაქზე, კარლის ხიდსა და მდინარეზე. პრატერი შესანიშნავია პიკნიკისთვის, სირბილისა თუ უბრალოდ დასვენებისთვის. აქ ნახავთ მეტრონომს, რომელიც კომუნისტური რეჟიმის დროინდელი სტალინის ძეგლის ადგილას დგას.

ვინოჰრადის რაიონში მდებარე ეს პარკი ადგილობრივების საყვარელი ადგილია დასასვენებლად და სპორტისთვის. ის ცნობილია თავისი ულამაზესი ხედებით პრაღის ციხეზე, განსაკუთრებით კი მზის ჩასვლისას. პარკში ნახავთ დიდ ლუდის ბაღს (Beer Garden), სადაც შეგიძლიათ ჩეხური ლუდი დააგემოვნოთ. აქტიური დასვენებისთვის არის საფეხბურთო მოედნები და სარბენი ბილიკები

ეს პატარა, მაგრამ ძალიან მომხიბვლელი ბაღი მდებარეობს მდინარე ვლტავას ნაპირზე, კარლის ხიდთან ახლოს, ფრანც კაფკას მუზეუმის უკან. ის ცნობილია თავისი უცნაური, მოძრავი ქანდაკებით, რომელიც ორ მამაკაცს ასახავს, რომლებიც ერთმანეთისკენ შარდავენ და ჩეხეთის რუკას ქმნიან. ბაღიდან ულამაზესი ხედები იშლება კარლის ხიდზე და მდინარეზე.

პრაღაში სამოგზაუროდ 4-5 დღე საკმარისია ძირითადი ღირსშესანიშნაობების დასათვალიერებლად. თუმცა, რადგან ქალაქი მდიდარია სანახავი ადგილებით, გირჩევთ, მოგზაურობისთვის მეტი დრო გამოყოთ, რათა სრულფასოვნად დატკბეთ მისი ხიბლით.

პრაღაში გამგზავრებამდე, პირველ რიგში, დარწმუნდით, რომ მოგზაურობისთვის საჭირო ყველა დოკუმენტი (პასპორტი, პირადობის მოწმობა) თან გაქვთ. პრაღაში ბევრ სიარულს მოგიწევთ, რადგან სასეირნო ადგილები მრავლადაა, ამიტომ აუცილებლად წაიღეთ კომფორტული ტანსაცმელი და ფეხსაცმელი, ასევე სეზონისთვის შესაფერისი სამოსი.

შეამოწმეთ ყველა ელექტრონული მოწყობილობა და დამტენი. სასურველია, გქონდეთ კომფორტული ზურგჩანთა, რომელშიც დღის განმავლობაში საჭირო ნივთებს მოათავსებთ. არ დაგავიწყდეთ პორტატული დამტენი, ხოლო ფოტოების მოყვარულებს ფოტოაპარატიც გამოგადგებათ. რადგან პრაღაში ხშირად მზიანი ამინდებია, არ დაგავიწყდეთ სათვალე და მზისგან დამცავი კრემიც.

პრაღა გამოირჩევა თავისი განსაკუთრებული არქიტექტურული მრავალფეროვნებით, სადაც ერთმანეთს ერწყმის რენესანსის, ბაროკოსა და გოთიკური სტილები. ქალაქის არქიტექტურული სიდიადე კარგად ჩანს მის ისტორიულ ღირსშესანიშნაობებში, როგორიცაა კარლის ხიდი და პრაღის ციხე.

ქუთაისიდან პრაღის მიმართულებით Wizz Air ახორციელებს პირდაპირ ფრენებს. ბათუმიდან გადაჯდომით ფრენებს შემოგთავაზებთ Turkish Airlines, ხოლო თბილისი პრაღა – Turkish Airlines, Pegasus, Austrian Airlines და LOT Polish Airlines.

პრაღაში მოგზაურობა საკმაოდ უსაფრთხოა. ქალაქში სეირნობისას შეგიძლიათ მშვიდად და აუღელვებლად იყოთ, თუმცა, ყოველთვის მიაქციეთ ყურადღება პირად ნივთებს.

პრაღაში სამოგზაუროდ გაზაფხული და შემოდგომა საუკეთესო სეზონებია, რადგან ამ დროს თავიდან აიცილებთ ზედმეტად გადაჭედილ ისტორიულ ძეგლებსა და პრაღის ქუჩებს.

PRG – ვაცლავ ჰაველის აეროპორტი პრაღაში (Václav Havel Airport Prague) ქალაქთან ყველაზე ახლოს მდებარე საერთაშორისო აეროპორტია, რომელიც დაახლოებით 15-17 კილომეტრის დაშორებითაა ქალაქის ცენტრიდან.

პრაღაში გაფრენა შეგიძლიათ როგორც თბილისიდან და ქუთაისიდან, ისე ბათუმიდანაც. თბილისიდან და ბათუმიდან მხოლოდ გადაჯდომით შეძლებთ მგზავრობას, ქუთაისიდან კი პირდაპირი ავიარეისებით.

პრაღა ევროპის ერთ-ერთი ყველაზე ხელმისაწვდომი ტურისტული ქალაქია. აქ, ევროპის სხვა დედაქალაქებთან შედარებით, მოგზაურობის საკმაოდ ბიუჯეტურად დაგეგმვას შეძლებთ.

მოგზაურობის მაქსიმალურად ბიუჯეტურად დაგეგმვისთვის, უმჯობესია პრაღაში გამგზავრების ავიაბილეთები 1 ან 2 თვით ადრე შეიძინოთ. ასევე რეკომენდებულია, რომ მოგზაურობა არ დაამთხვიოთ დიდ დღესასწაულებსა და ტურისტულ პიკს, რადგან ასეთ პერიოდში ფასები მნიშვნელოვნად იზრდება. წინასწარი დაგეგმვა მოგცემთ საშუალებას ავიაბილეთები იაფად შეიძინოთ და ბიუჯეტურად დაგეგმოთ დასვენება.