მადრიდი – დაგეგმე სრულყოფილი მოგზაურობა

თუ გსურთ, მადრიდში ადგილობრივივით იგრძნოთ თავი, მაშინ ლა ლატინას უბანი (La Latina) იდეალური არჩევანია. აქაური ნეოკლასიკური და გოთიკური არქიტექტურის ხიბლი თქვენს მოგზაურობას დაუვიწყარს გახდის, თანაც, ეს უბანი ტურისტულ ღირსშესანიშნაობებთან ახლოს მდებარეობს.

როგორც მისი სახელი მიგვანიშნებს, ლიტერატურული კვარტალი (Literary Quarter) ნამდვილი სამოთხეა ხელოვნებისა და კულტურის მოყვარულთათვის. თუ ამ უბანში გადაწყვეტთ დარჩენას, გარშემორტყმული იქნებით მუზეუმებითა და უამრავი კულტურული სანახაობით. გარდა ამისა, ლიტერატურული კვარტალი მდიდარია მრავალფეროვანი რესტორნებით, სადაც შეგიძლიათ დააგემოვნოთ როგორც ტრადიციული ესპანური, ისე საერთაშორისო სამზარეულო.

მადრიდის ცენტრში მდებარე ეს უბანი, ნამდვილად მრავალმხრივ გამოცდილებას გთავაზობთ. მიუხედავად იმისა, რომ მალასანა (Malasaña) პოპულარული ტურისტული ადგილია, თავისი ვიწრო ქუჩებით, უნიკალური მაღაზიებითა და მრავალფეროვანი რესტორნებით, ის ასევე ადგილობრივების საყვარელ თავშეყრის ადგილს წარმოადგენს. აქ შეძლებთ შეიგრძნოთ ქალაქის ენერგია და ამავდროულად, ჩაერთოთ ადგილობრივ ყოველდღიურობაში.

მადრიდის გული, სოლის უბანი (SOL), ტურისტებისთვის უდავოდ ყველაზე კომფორტულ არჩევნად ითვლება. ის ქალაქის ზუსტად შუაგულში მდებარეობს, რაც იმას ნიშნავს, რომ ყველა მთავარი ტურისტული ძეგლი, ისტორიული ღირსშესანიშნაობა და მონუმენტი ხელის ერთი გაწვდენითაა. თუ თქვენი პრიორიტეტი მადრიდში სწრაფი და მარტივი გადაადგილებაა, მაშინ სოლის უბანი საუკეთესო ვარიანტი იქნება.

თუ ფუფუნება და მაღალი კლასის დასვენება გიზიდავთ, მაშინ მადრიდის ელეგანტური უბანი, სალამანკა (Salamanca), თქვენთვისაა შექმნილი. აქ ნახავთ მდიდრულ სასტუმროებს, უმაღლესი კლასის ბუტიკებსა და მაღაზიებს, ასევე დახვეწილ რესტორნებსა და დასასვენებელ სივრცეებს, რომლებიც უზრუნველყოფენ დაუვიწყარ გამოცდილებას. სალამანკა ქალაქის ცენტრიდან დაახლოებით 20 წუთის სავალზე მდებარეობს.

მადრიდის ერთ-ერთი ყველაზე პოპულარული ღირსშესანიშნაობა Museo del Prado მსოფლიოს ერთ-ერთ უდიდეს ხელოვნების გალერეას წარმოადგენს. ის აუცილებლად მოსანახულებელი ადგილია ყველა ხელოვნების მოყვარულისთვის.

Museo Nacional Thyssen-Bornemisza მადრიდის სამუზეუმო “ოქროს სამკუთხედის” კიდევ ერთი მნიშვნელოვანი კომპონენტია. ეს კერძო კოლექცია, რომელიც მოგვიანებით ესპანეთის სახელმწიფოს გადაეცა, შესანიშნავად ავსებს პრადოსა და რეინა სოფიას კოლექციებს და გვთავაზობს ხელოვნების ისტორიის თითქმის სრულ მიმოხილვას.

აქ ნახავთ ნამუშევრებს ისეთი დიდი ოსტატებისგან, როგორებიც არიან: დიურერი, რუბენსი, კარავაჯო, მონე, რენუარი, ვან გოგი, სეზანი, პიკასო, კანდინსკი, მონდრიანი, პოლოკი.

Palacio Real de Madrid მადრიდში ვიზიტისას აუცილებლად უნდა ნახოთ მადრიდის სამეფო სასახლე, რომელიც არა მხოლოდ ესპანეთის დედაქალაქის, არამედ მთელი ქვეყნის ერთ-ერთი უმნიშვნელოვანესი ისტორიული და არქიტექტურული ძეგლია. ეს არის დასავლეთ ევროპის უდიდესი სამეფო სასახლე ფუნქციონირების მიხედვით, თუმცა დღესდღეობით სამეფო ოჯახი მას ძირითადად ოფიციალური ცერემონიებისთვის იყენებს და არა მუდმივი საცხოვრებლად.

ფეხბურთის მოყვარულთათვის მადრიდში ვიზიტი წარმოუდგენელია Estadio Santiago Bernabéu -ს მონახულების გარეშე. ეს არის საფეხბურთო კლუბ “რეალ მადრიდის” საშინაო არენა, ერთ-ერთი ყველაზე ლეგენდარული და ცნობილი სტადიონი მსოფლიოში, რომელიც 80 000-ზე მეტ გულშემატკივარს იტევს.

ბერნაბეუ არა მხოლოდ საფეხბურთო მატჩების მასპინძელია, არამედ ნამდვილი ისტორიული და კულტურული ძეგლიც. აქ შეგიძლიათ იგრძნოთ “რეალ მადრიდის” სიდიადე და ისტორია. სტადიონზე ტარდება ტურებიც.

მადრიდის ერთ-ერთი ყველაზე ცნობილი და გამორჩეული სიმბოლოა Fuente de Cibeles, რომელიც ქალაქის გულში, სიბელეს მოედანზე (Plaza de Cibeles) მდებარეობს. ეს დიდებული ნეოკლასიკური ნაგებობა არა მხოლოდ ხელოვნების ნიმუშია, არამედ მადრიდის ცენტრალური შეხვედრისა და ზეიმის ადგილი, განსაკუთრებით კი საფეხბურთო კლუბ “რეალ მადრიდის” გამარჯვებების აღსანიშნავად.

შადრევანი აშენდა მე-18 საუკუნის ბოლოს, არქიტექტორ ვენტურა როდრიგესის მიერ და წარმოადგენს ბერძნულ მითოლოგიაში ნაყოფიერების ქალღმერთ სიბელეს, რომელიც ლომებით შებმულ ეტლზე ზის. ქალღმერთს გვერდს უმშვენებს ორი ლომი, რომლებიც ჰიპომენესა და ატალანტას განასახიერებენ. შადრევანში წყალი ოთხი ნაკადულიდან მოედინება, რაც მდინარეებს ერბოროსა და სან-პედროს განასახიერებს.

Museo Nacional Centro de Arte Reina Sofía მადრიდის კიდევ ერთი გამორჩეული ხელოვნების საგანძურია, რომელიც ესპანური თანამედროვე ხელოვნების ერთ-ერთ უმნიშვნელოვანეს კოლექციას მასპინძლობს. ეს მუზეუმი განსაკუთრებით ცნობილია პაბლო პიკასოს შედევრით, “გერნიკა”, რომელიც ომის საშინელებების ამსახველი ერთ-ერთი ყველაზე მძლავრი ნამუშევარია მსოფლიო ხელოვნების ისტორიაში.

Puerta de Alcalá – მადრიდის ერთ-ერთი ყველაზე ცნობილი და შთამბეჭდავი სიმბოლოა. ის არ არის უბრალოდ თაღი, არამედ ნეოკლასიკური ტრიუმფალური თაღი, რომელიც მადრიდის ცენტრში, დამოუკიდებლობის მოედანზე (Plaza de la Independencia) მდებარეობს, პარკ რეტრიროს გვერდით.

Catedral de Santa María la Real de la Almudena მადრიდის სამეფო სასახლის გვერდით, ცენტრალურ ადგილას მდებარეობს, რომელიც მადრიდის მთავარი საკათედრო ტაძარი და ეპარქიის ცენტრია. მისი უნიკალურობა იმაში მდგომარეობს, რომ ის ერთ-ერთია იმ მცირერიცხოვან ტაძართაგან ესპანეთში, რომელიც ალკალას კარიბჭის მსგავსად, აღმოსავლეთით არ არის ორიენტირებული. ეს იმით აიხსნება, რომ იგი სამეფო სასახლის პირისპირ აშენდა, რათა სასახლის კომპლექსის ნაწილი გამხდარიყო.

Templo de Debod მადრიდის ერთ-ერთი ყველაზე უნიკალური და მოულოდნელი ღირსშესანიშნაობაა. ეს არ არის ესპანური, არამედ ძველეგვიპტური ტაძარი, რომელიც მადრიდს ეგვიპტემ აჩუქა, მადლობის ნიშნად ესპანეთის დახმარებისთვის ნუბიური ტაძრების გადარჩენის საქმეში, ასუანის მაღალი კაშხლის მშენებლობის დროს.

ტაძარი აშენდა ძვ. წ. მე-2 საუკუნეში. იგი ნაწილ-ნაწილ იქნა ჩამოტანილი ეგვიპტიდან და 1972 წელს მადრიდის ცენტრში, მონტანიას პარკში (Parque de la Montaña) თავიდან აიგო.

Basílica de San Francisco el Grande მადრიდის ისტორიულ ნაწილში მდებარეობს, რომელიც გამორჩეულია თავისი მონუმენტური გუმბათით – ესპანეთში სიდიდით მესამე და ევროპაში სიდიდით მეშვიდე გუმბათით. ეს დიდებული ნეოკლასიკური ნაგებობა ქალაქის ერთ-ერთ შთამბეჭდავ სიმბოლოდ ითვლება.

მადრიდში რესტორნები განსაკუთრებით პოპულარულია სადილისა და ვახშმის დროს. როგორც ადგილობრივები, ისე ტურისტები ხშირად იკრიბებიან ესპანურ კვების ობიექტებში, რადგან აქ სასიამოვნო და კომფორტული ატმოსფეროა.

ქვემოთ წარმოგიდგენთ ორ გამორჩეულ რესტორანს:

• სობრინო დე ბოტინი (Sobrino de Botín)
  ეს გახლავთ ევროპის უძველესი რესტორანი, რომელიც განთქმულია ტრადიციული ესპანური, ძირითადად კი ხორცის კერძებით. ის ინარჩუნებს თავდაპირველ, ძველ იერსა და ხიბლს, რაც მას უნიკალურს ხდის. ნამდვილად გირჩევთ ეწვიოთ ამ ისტორიულ ადგილს და დააგემოვნოთ მათი ცნობილი კერძები.
• ბოდეგა დე ლოს სეკრეტოს (Bodega de los Secretos)
  ეს რესტორანი ასევე ძველი ისტორიით გამოირჩევა. ის გთავაზობთ უძველეს კერძებს, რომელთა რეცეპტები 400 წელზე მეტს ითვლის. აქ შეგიძლიათ დააგემოვნოთ არა მხოლოდ ადგილობრივი, არამედ ხმელთაშუაზღვისპირეთის სამზარეულოს შედევრებიც.

ესპანური ტორტილა ადგილობრივების საყვარელი, ტრადიციული კერძია, რომელიც ძირითადად კარტოფილისგან მზადდება. მადრიდში რამდენიმე გამორჩეული ადგილია, სადაც ამ გემრიელ კერძს დააგემოვნებთ:

• El Sueño De Carmen
  აქ შეგიძლიათ დააგემოვნოთ საუკეთესო ტორტილა. ეს რესტორანი განსაკუთრებით პოპულარულია ადგილობრივებში, რაც მის ხარისხზე მეტყველებს.
• Casa Dani
  ეს ადგილი ასევე ცნობილია უგემრიელესი ტორტილით. შეგიძლიათ შეუკვეთოთ ტორტილა და მასთან ერთად სხვა ადგილობრივი კერძებიც დააგემოვნოთ.
• Sylkar
  Sylkar-იც ერთ-ერთ საუკეთესო ტორტილას გთავაზობთ. სასიამოვნო ატმოსფეროს გარდა, აქ სხვადასხვა სასმელსაც დააგემოვნებთ.

მადრიდი ცნობილია თავისი ღვინის კულტურით, ამიტომ ესპანური ღვინის დაგემოვნება აუცილებლად ღირს. თუ მადრიდში ხართ ან აპირებთ გამგზავრებას, გირჩევთ ეწვიოთ რამდენიმე გამორჩეულ ადგილს, სადაც გემრიელ ღვინოს შემოგთავაზებენ:

• Delito Madrid
  ეს არის ღვინის ბარი მადრიდში, სადაც ესპანური ღვინოების ფართო არჩევანი დაგხვდებათ. აქ შეგიძლიათ ღვინოსთან ერთად ადგილობრივი კერძებიც დააგემოვნოთ, რაც სრულყოფილ გასტრონომიულ გამოცდილებას შეგიქმნით.
• La Bodega de Los Reyes
  ამ ბარში დაგხვდებათ მშვენიერი ატმოსფერო ადგილობრივებთან გასაცნობად. La Bodega de Los Reyes ხშირად არის თავშეყრის ადგილი გასართობად და საკომუნიკაციოდ. რაც მთავარია, აქ ესპანური ღვინის მრავალფეროვანი ვარიანტებიც დაგხვდებათ.

მადრიდი მრავალფეროვან კულინარიულ გამოცდილებას გთავაზობთ, მათ შორის ისეთ რესტორნებს, სადაც გემრიელი კერძების პარალელურად, ულამაზესი ხედებითაც დატკბებით:

• La Terraza de Oscar
  ეს რესტორანი მე-8 სართულზე მდებარეობს და მისგან მადრიდის ულამაზესი პანორამული ხედები იშლება. აქ ფუნქციონირებს ბარიც, რაც ამ სივრცეს დასვენებისა და განტვირთვისთვის იდეალურს ხდის.
• Restaurante Volvoreta
  უდიდესი შუშის ფანჯრებით გამორჩეული Restaurante Volvoreta მთელი ქალაქის ხედს გთავაზობთ. ესთეტიკურ სიამოვნებასთან ერთად, აქ ხმელთაშუაზღვის პოპულარულ კერძებსაც დააგემოვნებთ.
• Villa Verbena
  თუ ბუნების მოყვარული ხართ, Villa Verbena-დან ულამაზესი ბუნებრივი ხედები გადაგეშლებათ. აქ შეგიძლიათ დააგემოვნოთ უგემრიელესი სასმელები და სრულად განტვირთოთ. ეს რესტორანი შესანიშნავ შესაძლებლობას იძლევა, ქალაქის ხმაურს მოწყდეთ და სიმშვიდეში გაატაროთ დრო.

მადრიდი ცნობილია თავისი ცოცხალი ბარების სცენით. თუ განტვირთვა და გართობა გსურთ, ესპანური ბარები თქვენთვის იდეალური ადგილია. აქაურობა ხშირად ადგილობრივების თავშეყრის ადგილია, რაც ავთენტურ გამოცდილებას გთავაზობთ. ქვემოთ წარმოგიდგენთ რამდენიმე ცნობილ ბარს:

• Salmon Guru
  Salmon Guru გამოირჩევა განსაკუთრებული ატმოსფეროთი. აქაური ბარმენები ინოვაციურ და მრავალფეროვან კოქტეილებს ამზადებენ, რომლებიც ნამდვილად გაგაოცებთ. ბარის მოხერხებული ლოკაცია კი საშუალებას მოგცემთ, მარტივად მიაგნოთ მას.
• 1862 Dry Bar
  მდებარეობს მადრიდის ერთ-ერთ ყველაზე ცნობილ და ცოცხალ კვარტალში, სადაც მრავლად შეხვდებით კაფე-ბარებს. 1862 Dry Bar გთავაზობთ საუკეთესო სასმელებს და იდეალური ადგილია იმისთვის, რომ შეიგრძნოთ ქალაქის პულსი და ისიამოვნოთ აქტიური ღამის ცხოვრებით.

სალამანკას უბანი (“ოქროს მილი”): თუ ფუფუნებისა და მაღალი კლასის შოპინგი გიყვართ, სალამანკას რაიონში მდებარე “ოქროს მილი” თქვენთვისაა. ეს უბანი მოიცავს ქუჩებს, როგორიცაა სერანო (Serrano), ორტეგა ი გასეტი (Ortega y Gasset) და ველასკესი (Velázquez). აქ ნახავთ მსოფლიოს წამყვანი დიზაინერების ბუტიკებს, იუველირებს და ძვირადღირებულ ბრენდებს, როგორიცაა Chanel, Dior, Louis Vuitton, Prada, Gucci და Hermès.

გრან ვია (Gran Vía): მადრიდის ცენტრალური და ყველაზე ცნობილი ქუჩა, რომელიც სავსეა პოპულარული ტანსაცმლის მაღაზიებითა და დიდი ქსელური ბრენდებით, როგორებიცაა Zara, Mango, Primark, H&M და სხვა. გრან ვია ასევე მასპინძლობს კინოთეატრებს, რესტორნებსა და ისტორიულ შენობებს, რაც შოპინგს კიდევ უფრო სასიამოვნოს ხდის.

კალიე ფუენკარალი (Calle Fuencarral) და მალასანას/ჩუეკას უბნები: ეს ტერიტორია ცნობილია თავისი ახალგაზრდული, თანამედროვე და ალტერნატიული მოდათი. აქ ნახავთ უამრავ ბუტიკს, ვინტაჟურ მაღაზიას, ტატუს სალონს, კომიქსების მაღაზიებს და ხელოვნების წიგნების მაღაზიებს. ჩუეკას უბანი ასევე ლგბტქ+ საზოგადოების გულია და მრავალფეროვან მაღაზიებს სთავაზობს ვიზიტორებს.

კალიე პრეშიადოსი (Calle Preciados): სოლის მოედანთან ახლოს მდებარე ეს საფეხმავლო ქუჩა ასევე პოპულარული სავაჭრო ადგილია, სადაც ნახავთ დიდ უნივერმაღებსა და ტანსაცმლის მაღაზიებს.

მადრიდიდან ხელცარიელი ნამდვილად ვერ წახვალთ! ესპანური კულტურის გამომხატველი უამრავი პატარა ნივთის შეძენას შეძლებთ. ქვემოთ გთავაზობთ რამდენიმე პოპულარულ სუვენირების მაღაზიას:

მადრიდის სუვენირები (Madrid Souvenirs)
ეს უზარმაზარი მაღაზია საშუალებას მოგცემთ, უპრობლემოდ შეარჩიოთ თქვენთვის სასურველი სუვენირები საყვარელი ადამიანებისთვის. აქ მრავალფეროვანი ასორტიმენტია, რაც გაგიმარტივებთ არჩევანს.

სოლის სუვენირები (Sol Souvenirs)
ეს მაღაზია ასევე დიდ მრავალფეროვნებას გიმზადებთ. მისი მოხერხებული მდებარეობა, ტურისტულ ღირსშესანიშნაობებთან ახლოს, გაგიმარტივებთ მიგნებას და შოპინგს კიდევ უფრო კომფორტულს გახდის.

ელ რასტრო (El Rastro): თუ ვინტაჟური ნივთები, ანტიკვარიატი და უნიკალური საგანძური გიყვართ, აუცილებლად ეწვიეთ ელ რასტროს. ეს არის მადრიდის უძველესი და ყველაზე დიდი რწყილების ბაზრობა, რომელიც ყოველ კვირას და სახალხო დღესასწაულებზე იმართება ლა ლატინას უბანში. აქ შეგიძლიათ იპოვოთ ყველაფერი – ძველი ავეჯიდან დაწყებული, მეორადი ტანსაცმლით, ხელნაკეთი ნივთებითა და საკოლექციო ნივთებით დამთავრებული.

მერკადო დე სან მიგელი (Mercado de San Miguel): მიუხედავად იმისა, რომ ეს ძირითადად გასტრონომიული ბაზარია, სადაც ტაპასებს დააგემოვნებთ, აქ ასევე შეგიძლიათ შეიძინოთ მაღალი ხარისხის ესპანური დელიკატესები, ღვინოები, ზეითუნის ზეთი და სხვა საკვები სუვენირები.

მერკადო დე სან ანტონი (Mercado de San Antón): ჩუეკას უბანში მდებარე ეს განახლებული ბაზარი აერთიანებს ტრადიციულ სავაჭრო სივრცეებსა და თანამედროვე გასტრონომიულ კუთხეებს, სადაც ადგილობრივ პროდუქტებსა და უნიკალურ ნივთებს ნახავთ.

გალერია კანალეხას (Galería Canalejas): მადრიდის ცენტრში მდებარე ეს ახალი, მდიდრული სავაჭრო გალერეა საერთაშორისო ბრენდებსა და მაღალი დონის რესტორნებს აერთიანებს.

ლას როსას ვილიჯი (Las Rozas Village): თუ აუთლეტ შოპინგი გიყვართ, მადრიდიდან მცირე მანძილზე მდებარე ლას როსას ვილიჯი გთავაზობთ ფასდაკლებებს 100-ზე მეტი ძვირადღირებული მოდის და ლაიფსტაილის ბრენდზე.

იცოდით, რომ მადრიდს 200-ზე მეტი ავტობუსის ხაზი ემსახურება? ეს ქალაქის აღმოსაჩენად შესანიშნავ საშუალებას იძლევა! აეროპორტიდან მადრიდის ცენტრამდე 24 საათის განმავლობაში შეგიძლიათ ისარგებლოთ ავტობუსით.

მეტროს ყველაზე იაფი ერთჯერადი ბილეთი €1.50 ღირს. არ დაგავიწყდეთ, რომ ავტობუსში აუცილებლად გაატაროთ ბილეთი, რათა თავიდან აიცილოთ დაჯარიმება.

ავტობუსები მუშაობენ დილის 6:00-დან ღამის 11:30-მდე, დასვენების დღეებში კი დილის 7:00-დან 11:00-მდე. თუმცა, თუ მადრიდის ღამის ცხოვრებას ეცნობით და ტაქსის თავიდან არიდება გსურთ, ქალაქში ღამის ავტობუსებიც ფუნქციონირებს, რომლებიც 11:30-დან მოგემსახურებიან.

ტაქსით მგზავრობა მადრიდში შედარებით ძვირი სიამოვნებაა, თუმცა თუ სწრაფი და კომფორტული გადაადგილება გსურთ, ეს საუკეთესო ვარიანტია. ტაქსის ტარიფები €2.50-დან იწყება. მადრიდში შეგიძლიათ ისარგებლოთ ისეთი ცნობილი ტაქსის კომპანიებით, როგორებიცაა: Bolt, Uber, Cabify და FREENOW.

მადრიდში ელექტრო-სკუტერები გადაადგილების ერთ-ერთი ყველაზე პოპულარული და მოსახერხებელი საშუალებაა. მათი დაქირავება ძალიან მარტივია: უბრალოდ დაასკანერეთ QR კოდი და მზად ხართ გასამგზავრებლად! სკუტერები საკმაოდ ხელმისაწვდომია, მათი ფასი წუთში €0.11-დან €0.23-მდე მერყეობს.

მადრიდში მეტრო გადაადგილების ყველაზე სწრაფი და მარტივი საშუალებაა. ქალაქს მეტროს 8 მარშრუტი აქვს, სხვადასხვა ფერებში, რაც ნავიგაციას კიდევ უფრო ამარტივებს. მეტროთი აეროპორტიდანაც კი შეძლებთ გადაადგილებას.

მეტროს ბილეთის ფასი €1.50-დან €2.50-მდე მერყეობს. მეტრო მუშაობს დილის 6:00-დან ღამის 1:30-მდე. შეგიძლიათ შეიძინოთ რამდენიმედღიანი აბონიმენტიც, რაც ხშირი გადაადგილების შემთხვევაში მოგებას მოგიტანთ. მეტროს ბილეთებს შეიძენთ როგორც სადგურებში, ასევე კიოსკებშიც.

მადრიდში ველოსიპედით გასეირნებაც უპრობლემოდ შეგიძლიათ. ქალაქში მრავლადაა ველო-ბილიკები და ველოსიპედის დაქირავებაც მარტივია. განსაკუთრებით მოსახერხებელია ელექტრო-ველოსიპედები, რომლებიც ნაკლებ ენერგიას მოითხოვს და ქალაქის აღმართების დაძლევაში დაგეხმარებათ.

ეს არის მადრიდის ყველაზე ცნობილი და ალბათ ყველაზე ლამაზი პარკი, რომელიც ქალაქის გულში მდებარეობს. 125 ჰექტარზე გაშლილი რეტრირო, ოდესღაც სამეფო ოჯახის კუთვნილება იყო. აქ ნახავთ: დიდ აუზს, ბროლის სასახლეს, ვარდების ბაღს, ასევე მრავალ ქანდაკებას, შადრევანს და ხეივნებს, რომლებიც სასეირნოდ იდეალურ გარემოს ქმნის.

მდებარეობს სამეფო სასახლის ჩრდილოეთ ნაწილში. ეს ნეოკლასიკური ბაღები აშენდა მეფე ფელიპე II-ის ცხენების საწვრთნელი მოედნის ადგილას. ბაღები გამოირჩევა თავისი გეომეტრიული დიზაინითა და მოვლილი ჰეჯირებით. ლამაზი შადრევნებითა და ქანდაკებებით. სასახლისა და მთების შესანიშნავი ხედებით. განსაკუთრებით შთამბეჭდავია მზის ჩასვლისას.

მდებარეობს ლა ლატინას უბანში და ცნობილია ულამაზესი ხედებით მანძანარესის მდინარეზე და კასა დე კამპოზე. განსაკუთრებით პოპულარულია მზის ჩასვლისას, რომანტიული ატმოსფეროს გამო. აქ ხშირად იმართება ზაფხულის კონცერტები და ფესტივალები. ეს პარკები მადრიდს განსაკუთრებულ ხიბლს სძენს და მოგზაურებს საშუალებას აძლევს, ქალაქის სილამაზე სხვა კუთხითაც აღმოაჩინონ.

მადრიდის ყველაზე დიდი ურბანული პარკი, რომელიც დაახლოებით 1700 ჰექტარ ფართობს მოიცავს. ის ხუთჯერ აღემატება ნიუ-იორკის ცენტრალურ პარკს! კასა დე კამპო ნამდვილი ტყიანი ოაზისია ქალაქის პირას. აქ ნახავთ: მადრიდის ზოოპარკსა და აკვარიუმს, გასართობ პარკს, საბაგირო გზას, ასევე საცურაო აუზებს, სარბენ ბილიკებს და საპიკნიკე ადგილებს. ეს იდეალური ადგილია ბუნების მოყვარულთათვის და აქტიური დასვენებისთვის.

ასევე სამეფო სასახლის ტერიტორიაზე მდებარეობს, მაგრამ სასახლის დასავლეთ მხარეს. ეს ბაღები გამორჩეულია თავისი რომანტიკული და ინგლისური სტილის დიზაინით. იშვიათი მცენარეებით, შადრევნებითა და ჩანჩქერებით. ფარშევანგებითა და სხვა ფრინველებით, რომლებიც თავისუფლად დადიან ბაღებში. იგი ნაკლებად ხალხმრავალია ვიდრე რეტრირო, რაც მას მშვიდი გასეირნებისთვის იდეალურს ხდის.

იმისათვის, რომ მადრიდის მთავარი ღირსშესანიშნაობების, პარკებისა და კულტურული ძეგლების დასათვალიერებლად საკმარისი დრო გქონდეთ, მოგზაურობისთვის 4-5 დღე აუცილებლად უნდა გაითვალისწინოთ.

მადრიდში ვიზიტისას, პირველ რიგში, დარწმუნდით, რომ მოგზაურობისთვის საჭირო ყველა დოკუმენტი თან გაქვთ. ქალაქში ბევრ სიარულს მოგიწევთ, ამიტომ უმჯობესია თან იქონიოთ კომფორტული ფეხსაცმელი და ტანსაცმელი. ასევე, აუცილებლად შეამოწმეთ თქვენი საკრედიტო ბარათები.

მადრიდში, ძირითადად, თბილი ამინდებია, ამიტომ სეზონის შესაფერისად გამოეწყვეთ. თუ ბევრი ფოტოს გადაღებას აპირებთ, არ დაგავიწყდეთ ფოტოაპარატი. ადგილზე კი შეგიძლიათ შეიძინოთ ქალაქის რუკები, რაც მოგზაურობას კიდევ უფრო გაგიმარტივებთ.

მადრიდი, ესპანეთის დედაქალაქი, ხელოვნების, ისტორიის, კულინარიისა და ცოცხალი ღამის ცხოვრების სინთეზია. ის გთავაზობთ მსოფლიო დონის მუზეუმებს (პრადო, რეინა სოფია), დიდებულ სასახლეებსა და პარკებს (სამეფო სასახლე, რეტრიროს პარკი). ქალაქში გადაადგილება მარტივია განვითარებული სატრანსპორტო სისტემით, ხოლო საუკეთესო დრო გაზაფხული ან შემოდგომაა, როდესაც ამინდი კომფორტულია. მადრიდი დაუვიწყარ გამოცდილებას გპირდებათ.

მადრიდი არც ისე ძვირი ქალაქია – აქ ყავას 2 ევროდ შეიძენთ, კვებაზე კი საშუალოდ 15 ევრომდე დაგეხარჯებათ. მადრიდში დღეში 70 ევრო საშუალო ბიუჯეტია.

მადრიდი, ზოგადად, უსაფრთხო ქალაქად ითვლება ევროპის დედაქალაქებს შორის. ძალადობრივი დანაშაულის დონე დაბალია ისეთ ქალაქებთან შედარებით, როგორებიცაა პარიზი, ლონდონი ან რომი. შეგიძლიათ მშვიდად ისეირნოთ ქუჩებში დღისითაც და ღამითაც, განსაკუთრებით ქალაქის ცენტრალურ და ცოცხალ უბნებში.

თუმცა, როგორც ნებისმიერ დიდ ქალაქში, მადრიდშიც არის წვრილმანი დანაშაულის, განსაკუთრებით ჯიბგირობის რისკი. ეს განსაკუთრებით ეხება ტურისტულ ზონებსა და ხალხმრავალ ადგილებს, ამიტომ ყურადღებით იყავით პირად ნივთებთან.

ამინდის გათვალისწინებით, მადრიდში სამოგზაუროდ გაზაფხული ან შემოდგომა საუკეთესო პერიოდია.

მადრიდის ბარახას აეროპორტი (MAD) ქალაქის ცენტრთან საკმაოდ ახლოს მდებარეობს, დაახლოებით 12-18 კილომეტრში, რაც მას მოგზაურთათვის ძალიან მოსახერხებელს ხდის. ეს იმას ნიშნავს, რომ ცენტრამდე მისვლა სწრაფად და მარტივად არის შესაძლებელი სხვადასხვა სატრანსპორტო საშუალებით.

მადრიდში პირდაპირი რეისებით გამგზავრება ქუთაისის აეროპორტებიდან შეგიძლიათ. ხოლო თბილისიდან და ბათუმიდან ამ ეტაპზე, პირდაპირ ფრენებს ვერ ნახავთ, თუმცა ხელმისაწვდომია გადაჯდომითი ფრენები.

ქუთაისი მადრიდი პირდაპირ ფრენებს ავიაკომპანია Wizz Air გვთავაზობს, ხოლო თბილისი მადრიდი კი გადაჯდომით რეისებით შეგიძლიათ ისარგებლოთ ისეთი ავიაკომპანიების ფრენებზე, როგორებიცაა: Pegasus, Lufthansa და სხვა.

მადრიდში მოგზაურობის მაქსიმალურად ბიუჯეტურად დასაგეგმად, პირველ რიგში, აუცილებელია 1 ან 2 თვით ადრე შეიძინოთ იაფი ავიაბილეთები და დასვენება არ დაამთხვიოთ დიდ დღესასწაულებს.